மலேசியத் தமிழ்ப்பள்ளிகளின் இன்றைய நிலை !

தற்போது நாட்டில் 526 தமிழ்ப்பள்ளிகள் உள்ளன. அவற்றில் 77 சதவிகித தமிழ்ப்பள்ளிகள் பகுதி மானியம் பெறுபவையாகும். அதாவது 120 பள்ளிகள் மட்டுமே அரசாங்கத்தின் முழு மானியம் பெறுகின்றன. இதர 406 தமிழ்ப்பள்ளிகள் தனியார் நிலங்களில் இருப்பதன் ஒரே காரணத்தால் இவை அடிப்படை வசதி குறைந்த நிலையில் இருக்கின்றன. இப்பிரச்னை பல ஆண்டுகளாக தொடர்ந்து வருவதும், அவ்வப்போது அரசியல் தலைவர்களும், தலைமையாசிரியர் மன்றங்களும் மற்றும் அரசு சார்பற்ற அமைப்புகளும் குரல் எழுப்பி வருகின்றன.

கடந்த ஜூன் மாதத்தில் பூலாவ் லங்காவியில் தமிழ்ப்பள்ளி தலைமையாசிரியர் சங்கப் பேராளர் கூட்டத்திலும் இப்பிரச்னை விவாதிக்கப்பட்டு சங்கத்தின் கோரிக்கையாக அரசாங்கத்திடம் விடுக்கப்பட்டுள்ளது. இந்தக் கோரிக்கை விரைவில் ஏற்கப்பட வேண்டும் என்பதே இந்திய சமூகத்தின் எதிர்ப்பார்ப்பாகும்.

இன்னமும் அவை தனியார் நிலங்களில் இருக்கின்றன என்று கல்வி அமைச்சு சாக்குப்போக்குச் சொல்லி தமிழ்ப்பள்ளிகளின் அடிப்படை வசதிகளான தரமான கட்டடம் மற்றும் மேசை, நாற்காலிகள் வழங்குவதில் பாரபட்சம் காட்டுவதில் என்ன நியாயமிருக்கிறது ?